Íslendingaliðið Gummersbach tapaði í kvöld í toppleik þýsku 2. deildarinnar í handknattleik er það sótti Eintracht Hagen heim, 40:36, eftir að hafa verið fjórum mörkum undir í hálfleik, 20:16. Eins og tölurnar gefa til kynna þá var fátt um varnir hjá báðum liðum en þeim mun meira um að vera í sóknarleiknum.
Þrátt fyrir tap er Gummersbach áfram efst í deildinni með 18 stig eftir 11 leiki. Hagen er næst með 16 stig eins og Hüttenberg, sem lagði Aue, 35:26. Með Aue leika Arnar Birkir Hálfdánsson og Sveinbjörn Pétursson markvörður.
Elliði Snær Viðarsson skoraði sex mörk í sjö skotum fyrir Gummersbach gegn Hagen auk þess sem sem honum var vísað af leikvelli einu sinni. Hákon Daði Styrmisson skoraði þrjú mörk í fimm skotum. Honum brást bogalistin í tvígang í vítaköstum. Guðjón Valur Sigurðsson er þjálfari Gummersbach.
Arnar Bikir lét til sín taka í liði EHV Aue eins og venjulega. Hann skoraði fjögur mörk í níu skotum, átti þrjár stoðsendingar og var einu sinni vísað af leikvelli. Sveinbjörn kom við sögu í stutta stund í marki Aue og varði eitt skot.
EHV Aue er í 14. sæti af 20 liðum með átta stig eftir 11 leiki.
TV Emsdetten, með Anton Rúnarsson innanborðs, átti að mæta Coburg í kvöld á heimavelli. Leikmenn Coburg eru í sóttkví vegna smita. Þar af leiðandi var leiknum frestað.
