Handknattleikskonan Tinna Soffía Traustadóttir hefur tekið fram handboltaskóna á ný eftir sex ára hlé og er byrjuð að leika á ný með Selfossliðinu í Grill66-deild kvenna eins og lesendur handbolta.is hafa vafalaust tekið eftir.
Tinna Soffía var ein af þeim sem endurvöktu meistaraflokk kvenna hjá Selfossi á sínum tíma og spilaði með liði félagsins allt til ársins 2015, þegar hún þurfti að leggja skóna á hilluna vegna höfuðmeiðsla.
Tinna Soffía á að baki 54 leiki með Selfoss og skorað í þeim 117 mörk ásamt því að hafa verið atkvæðamikil í vörninni. Hún hefur farið vel af stað með liðinu í vetur og verið drjúg bæði sóknar- og varnarlega, segir í tilkynningu frá handknattleiksdeild Selfoss þar sem greint er frá komu Tinnu Soffíu á handknattleiksvöllinni á nýjan leik.
„Það er því mikil ánægja að Tinna skuli hafa samið aftur við Selfoss og bjóðum við hana velkomna aftur til leiks,“ segir ennfremur í fyrrgreindri tilkynningu.
Selfoss er ásamt ÍR í þriðja til fjórða sæti Grill66-deildar kvenna með níu stig, aðeins einu stigi á eftir FH og ungmennaliði Fram sem hafa leikið einu leik fleira.
Stöðuna og næstu leiki í Grill66-deild kvenna er að finna hér.
