Í gærkvöld lauk 2. umferð Olísdeildar karla í handknattleik með viðureign Stjörnunnar og ÍBV í TM-höllinni og í kvöld verður bundinn endi á 6. umferð deildarinnar þegar Grótta sækir Selfoss heim í Sethöllina á Selfossi. Leiknum var frestað í lok október þegar Selfossliðið stóð í ströngu í Evrópubikarkeppninni.
Selfoss situr í áttunda sæti Olísdeildar með sex stig að loknum átta leikjum. Grótta er tveimur sætum neðar og einu stigi á eftir, einnig eftir sjö leiki.
Olísdeild karla:
Sethöllin: Selfoss – Grótta, kl. 19.30 – sýndur á Selfosstv.
Stöðuna og næstu leiki í Olísdeild karla má sjá hér.
Úrslitaleikur í Belgrad
Fyrir utan leikinn hér heima þá standa þrjú landslið í ströngu í dag. U18 ára landslið kvenna mætir Serbum í úrslitaleik um keppnisrétt í A-deild Evrópumótsins 2023. Flautað verður til leiks í keppnishöllinni í Belgrad klukkan 17. Útsending verður frá leiknum á ehftv.com en einnig verður handbolti.is með stöðu- og textauppfærslu meðan á viðureigninni stendur.
Um hreinan úrslitaleik verður að ræða þar sem bæði lið unnu tvo fyrstu leiki sína í keppninni á mánudag og þriðjudag.
Klukkan 15 mætir B-landslið kvenna í handknattleik U20 ára lið Noregs í fyrstu umferð á móti í Cheb í Tékklandi.
Klukkan 17 leiða landslið Íslands og Noregs saman hesta sína í Cheb einnig í fyrstu umferð alþjóðlegs móts í Cheb í Tékklandi.
A- og B-landsliðin taka þátt í tveimur aðskildum mótum sem lýkur á laugardaginn.
Ekki verður boðið upp á steymi frá leikjunum í Cheb, eftir því sem næst verður komist.
