- Auglýsing -
- Þórir Hergeirsson, landsliðsþjálfari Evrópumeistara Noregs í handknattleik kvenna, stýrði liði sínu til stórsigurs á heimsmeisturum Hollands í fyrstu umferð á æfingamóti í Noregi í gær, 39:21. Sanna Solberg var markahæst í norska liðinu með sjö mörk. Danick Snelder, Bo van Wetering, Kelly Dulfer, Kelly Vollebregt og Dione Housheer skoruðu þrjú mörk hver fyrir hollenska landsliðið sem hélt í við það norska fyrsta stundarfjórðung leiksins.
- Í hinum leik mótsins þá vann silfurlið Ólympíuleikanna í sumar, Rússland, liðsmenn Suður Kóreu með 10 marka mun, 34:24. Ekki verður leikið á mótinu í dag. Önnur umferð fer fram á morgun og lokaleikirnir verða á sunnudag og þá mætast m.a. Noregur og Rússland.
- Aðalsteinn Eyjólfsson og lærisveinar hans í Kadetten Schaffhausen töpuðu í gærkvöld sínu fyrsta stigi í svissnesku úrvalsdeildinni í handknattleik þegar Kadetten gerði jafntefli við Zürich, 33:33. Kadetten er með 23 stig í efsta sæti deildarinnar eftir 12 leiki. Zürich-liðið situr í öðru sæti með 17 stig en hefur lokið 13 leikjum.
- Ola Lindgren hefur verið ráðinn þjálfari sænska liðsins HIF Karlskronas. Lindgren var um árabil þjálfari karlaliðs IFK Kristianstad með góðum árangri auk þess að stýra sænska landsliðinu ásamt Staffan Olsson frá 2008 til 2016. Lindgren verður áfram þjálfari finnska karlalandsliðsins sem hann hefur stýrt frá 2019.
- Auglýsing -
