- Auglýsing -
- Kristján Örn Kristjánsson, Donni, heldur uppteknum hætti í frönsku 1. deildinni í handknattleik. Hann var markahæstur í gærkvöld hjá PAUC ásamt Matthieu Ong með sex mörk þegar liðið vann Dunkerque, 30:29, í æsispennandi leik í Dunkerque. PAUC er í þriðja sæti með 17 stig eftir 11 leiki og er jafnt Nantes að stigum. Nantes er fyrir ofan á betri markatölu.
- Elvar Ásgeirsson skoraði aðeins tvö mörk þegar Nancy tapaði fyrir Istres, 27:23, á heimavelli í gærkvöld í frönsku 1. deildinni. Róðurinn þyngist hjá Nancy sem er neðst í deildinni en Istres komst upp í næst neðsta sæti með sigrinum, er með sex stig.
- Ágúst Elí Björgvinsson varði eitt vítakast þegar lið hans Kolding gerði jafntefli á heimavelli við Nordsjælland, 28:28, í dönsku úrvalsdeildinni í gærkvöldi. Kolding er í 13. sæti með sjö stig eftir 12 leiki en 15 lið eru í dönsku úrvalsdeildinni á þessari leiktíð.
- Grétar Ari Guðjónsson náði sér aldrei slíku vant ekki á strik þann tíma sem hann stóð í marki Nice í gærkvöld er það vann Sélestat, 32:29, í frönsku 1. deildinni í handknattleik. Leikið var á heimavelli Nice sem er eftir sem áður í 10. sæti deildarinnar með 10 stig að loknum 11 leikjum.
- Anton Rúnarsson skoraði ekki fyrir Emsdetten en átti eina stoðsendingu þegar liðið gerði jafntefli, 18:18, við Dormagen á útilvelli í þýsku 2. deildinni í handknattleik í gærkvöld. Emsdetten er í 12. sæti af 20 liðum deildarinnar með 10 stig þegar 12 leikir eru að baki.
- Daníel Freyr Andrésson varði 11 skot, 33% markvarsla, þegar Guif tapaði fyrir Sävehof, 33:24, á heimavelli í sænsku úrvalsdeildinni í handknattleik í gærkvöld. Aron Dagur Pálsson skoraði ekki mark fyrir Guif en átti tvær stoðsendingar. Þrátt fyrir tapið heldur Guif áttunda sæti deildarinnar.
- Auglýsing -
