Þór á Akureyri vann Vængi Júpíters með fimm marka mun, 28:23, í Grill66-deild karla í handknattleik í gærkvöld en leikið var í Íþróttahöllinni á Akureyri. Gestirnir að sunnan voru marki yfir að loknum fyrri hálfleik.
Samkvæmt frásögn á vefsíðunni Akureyri.net var það ekki fyrr en í síðari hálfleik sem Þórsarar komust fram úr eftir að leikmenn Vængjanna höfðu gert sitt til að halda hraða leiksins niðri.
Norður Makedóníumaðurinn, Tomislav Jagurinovski, sem gekk til liðs við Þórsara í síðasta mánuði, meiddist í síðasta leik fyrir hálfum mánuði og kom af þeirri ástæðu ekkert við sögu í gærkvöld.
Jóhann Einarsson fór á kostum í liði Þórs og skoraði 12 mörk auk sex stoðsendinga. Einnig varði Arnar Þór Fylkisson vel í marki Þórsara, alls 13 skot, þar af eitt vítakast.
Tekið var á móti 100 áhorfendum og var öllum sóttvarnareglum fylgt í hvívetna.
Mörk Þórs: Jóhann Einarsson 12, Viðar Ernir Reimarsson 3, Arnór Þorri Þorsteinsson 3, Ágúst Örn Vilbergsson 3, Aðalsteinn Ernir Bergþórsson 2, Arnþór Gylfi Finnsson 2, Halldór Yngvi Jónsson 2, Kristján Gunnþórsson 1.
Engum sögum fer af því hverjir skoruðu 23 mörk Vængja Júpíters enda hefur hvorki leiksksýrslan borist frá Þór né upplýsingar verið færðar inn í mótakerfi HSÍ þegar þessi frásögn er skrifuð um klukkan átta árdegis á laugardegi.
Þór er í fjórða sæti Grill66-deildar með átta stig að loknum sjö leikjum og hefur jafnmörg stig og Ungmennalið Selfoss sem vann Fjölni í gærkvöldi, 31:29. Selfoss hefur leikið tveimur viðureignum færra.
Vængir Júpíters eru í 10. og næst neðsta sæti með tvö stig.
