- Auglýsing -
- Aðalsteinn Eyjólfsson hefur skrifað undir nýjan samning við svissneska handknattleiksliðið Kadetten Schaffhausen. Nýi samingurinn gildir fram á mitt árið 2023 en fyrri samningur var með gildistíma til loka júní á næsta ári. Kadetten varð bikarmeistari í Sviss á síðasta tímabili og lék í Evrópudeildinni. Á þessari leiktíð ber Kadettenliðið höfuð og herðar yfir önnur lið deildarinnar og er til að mynda taplaust eftir 12 umferðir. Aðalsteinn tók við þjálfun Kadetten sumarið 2020.
- Bjarki Már Elísson var í liði 13. umferðar í þýsku 1. deildinni sem lauk á sunnudaginn. Bjarki Már átti stórleik og skoraði 12 mörk í 13 skotum þegar lið hans Lemgo tapaði á heimavelli fyrir Hannover Burgdorf, 33:31, í fyrradag. Þetta er í þriðja sinn á keppnistímabilinu sem Bjarki Már er í liði umferðarinnar. Hann er kominn upp í þriðja sæti á lista yfir markahæstu menn deildarinnar með 81 mark, er þremur á eftir Niclas Ekberg hjá Kiel sem er efstur.
- Aron Dagur Pálsson skoraði eitt mark fyrir Guif þegar liðið tapaði á útivelli fyrir Kristianstad, 34:26, í sænsku úrvalsdeildinni í handknattleik í gærkvöld. Daníel Freyr Andrésson markvörður stóð í marki Guif í leiknum en vegna bilunar í tölvukerfi sænska handknatteikssambandsins seint í gærkvöld var ekki hægt að nálgast upplýsingar um frammistöðu Daníels Freys. Guif er í áttunda sæti deildarinnar en Kristianstad er á toppnum.
- Evrópumeistarar Noregs í handknattleik kvenna töpuðu fyrir Rússlandi með eins marks mun, 29:28, í síðasta vináttulandsleiknum áður en það heldur af stað til Spánar til þátttöku á heimsmeistaramótinu sem hefst á morgun. Áður hafði norska landsliðið unnið heimsmeistara Hollands og landslið Suður Kóreu örugglega á fjögurra liða móti í Noregi. Fyrsti leikur Norðmanna á HM verður á móti Kasakstan á föstudaginn
- Auglýsing -
