ÍBV á leikmann á HM – leika ekki fleiri leiki á árinu

Serbneska handknattleikskonan hjá ÍBV, Marija Jovanovic, var valin í serbneska landsliðið sem tekur þátt í heimsmeistaramótinu á Spáni en mótið verður sett á morgun. Af þeim sökum leikur ÍBV vart fleiri leiki í Olísdeildinni fyrr en eftir áramót.

Jovanovic gekk til liðs við ÍBV í sumar og lék sinn fyrsta A-landsleik fyrir Serbíu gegn íslenska landsliðinu í undankeppni EM í Kaplakrika 10. október. Hún var valin í æfingahóp Serba fyrir mótið og er nú komin í gegnum nálaraugað og alla leið til Spánar á heimsmeistaramótið.

Serbar verða í B-riðli á HM með landsliðum Rússa, Pólverja og Kamerúna. Fyrsti leikur Serba verður á móti Pólverjum á föstudaginn í Llíria, rétt norður af Valencia.