Ungmennalið Selfoss kann vel við sig í Dalhúsum. Það má telja næsta víst. Ekki er langt um liðið síðan liðið setti strik í reikninginn hjá Fjölni í heimsókn sinni í Dalhús. Í kvöld mættu hinir ungu Selfyssingar á nýjan leik í Grafarvoginn og lögðu þá Vængi Júpíters með tveggja marka mun, 33:31. Selfoss liðið vann einmitt Fjölni með tveggja marka mun í Dalhúsum á dögunum.
Tryggvi Sigurberg Traustason gerði leikmönnum Vængja Júpíters gramt í geði að þessu sinni. Þeir réðu ekkert við pilt sem skoraði 11 mörk. Sölvi Svavarsson var einnig í ham og skoraði átta mörk fyrir gestina.
Vængirnir voru tveimur mörkum yfir að loknum fyrri hálfleik, 16:14. Þeir töpuðu þræðinum í síðari hálfleik með þeim afleiðingum að Selfossliðið gekk á lagið og vann.
Með sigrinum komst Selfoss upp í fimmta sæti deildarinnar með 10 stig að loknum átta leikjum. Vængir Júpíters er áfram næsta neðstir 11 liða í deildinni með tvö stig.
Mörk Vængja Júpíters: Gísli Steinar Valmundsson 9, Brynjar Jökull Guðmundsson 5, Sigþór Gellir Michaelsson 4, Viktor Orri Þorsteinsson 3, Gunnar Valur Arason 2, Jóna Eyjólfur Jónasson 2, Albert Garðar Þráinsson 2, Hlynur Már Guðmundsson 2, Guðmunur Rögnvaldsson 1, Ástgeir Rúnar Sigmarsson 1.
Mörk Selfoss U.: Tryggvi Sigurberg Traustason 11, Sölvi Svavarsson 8, Guðjón Baldur Ómarsson 6, Gunnar Flosi Grétarsson 3, Árni Ísleifsson 2, Hans Jörgen Ólafsson 1, Vilhelm Freyr Steindórsson 1, Gunnar Kári Bragason 1.
Stöðuna og næstu leiki í Grill66-deild karla má sjá hér.
