Síðari leikur 32-liða úrslita Coca Cola-bikarkeppni karla fer fram í kvöld þegar Stjarnan og Afturelding leiða saman hesta sína í TM-höllinni í Garðabæ. Flautað verður til leiks klukkan 19.30. Til stóð að Hörður og Fjölnir mættust í íþróttahúsinu Torfnesi í kvöld en fyrir um viku gáfu Fjölnismenn leikinn. Hörður er þar með kominn áfram í 16-liða úrslit eins og ÍBV sem vann Fram í gær, 29:25, í Framhúsinu.
Stjarnan og Afturelding mættust síðast á föstudaginn var í 12. umferð Olísdeildar karla. Leiknum lauk með jafntefli, 26:26, eftir afar spennandi lokamínútur. Afturelding var með tíu marka forskot, 22:12, þegar 20 mínútur voru til leiksloka. Leikmönnum liðsins féll allur ketill í eld eftir það. Stjörnumenn nýttu tækifærið og unnu jafnt og þétt upp forskotið og tryggðu sér annað stigið. Í kvöld verður ekki í boði fyrir liðin að skilja með skiptan hlut.
Í september mættust liðin í Mosfellsbæ og úr varð bráðskemmtilegur leikur sem Stjarnan vann naumlega með eins marks mun, 36:35.
Til viðbótar við viðureignina í Garðabæ þá verður ekki síður spenna í lofti í Kaplakrika þegar tvö af þremur efstu liðum Grill66-deild kvenna, FH og ÍR, mætast kl. 19.30. Aðeins munar einu stigi á liðunum eftir að hvort þeirra hefur leikið átta sinnum.
Leikir kvöldsins
Coca Cola-bikar karla, 32-liða úrslit:
TM-höllin: Stjarnan – Afturelding, kl. 19.30 – sýndur beint á ruv.is. Einnig verður textalýsing á handbolti.is.
Grill66-deild kvenna:
Kaplakriki: FH – ÍR, kl. 19.30.
Stöðuna og næstu leiki í Grill66-deild kvenna má sjá hér.
