Þrír leikmenn voru reknir úr kvennaliði Víkings í handknattleik í haust. Tvær þeirra, Steinunn Birta Haraldsdóttir og Alana Elín Steinarsdóttir, segja sögu sína í samtali við vísir.is í morgun. Brottreksturinn er sagður án fyrirvara og skýringar sem þeim voru gefnar þykja rýrar í roðinu. Víkingsliðið leikur í Grill66-deildinni.
„Þetta var mikið sjokk. Við fengum bara þetta símtal á fimmtudegi þar sem þjálfarinn bannaði okkur að æfa og keppa með liðinu. Við þurftum svo að bíða í fimm daga eftir einhverjum raunverulegum útskýringum á því af hverju þetta var gert,“ segir Steinunn í samtali við Vísi.
Steinunn hefur verið hjá Víkingi í átta ár og m.a. þjálfað yngri flokka hjá deildinni. Henni var boðið að halda áfram þjálfun eftir brottreksturinn úr leikmannahópi meistaraflokks.
Tjáði sig of mikið
Skýringar sem þær stöllur fengu á fundi með þjálfara og stjórn handknattleiksdeildar voru m.a. að þær væru vinkonur og að ein þeirra tjáði sig of mikið. „Þjálfarinn hefur greinilega verið búinn að vera ósáttur við okkur en nefndi það aldrei við okkur. Allt í einu tekur hann þessa ákvörðun, án þess að vara okkur við eða tala við okkur áður.
Þegar við spyrjum hver ástæðan sé þá segir hann að við Steinunn kvörtum of mikið. Við erum raddsterkir leikmenn og tölum um það sem þarf að laga og látum vita ef við erum ósáttar, varðandi hvað sem er,“ segir Alana við Vísi.
Þörf var á vinnufrið
Haraldur Haraldsson, framkvæmdastjóri Víkings, segir í samtali við Vísi að ákvörðunin um brottreksturinn hafi verið ákvörðun þjálfarans, Sigfúsar Páls Sigfússonar. Slæmur andi hafi verið innan liðsins og eitthvað hafi verið nauðsynlegt að gera. „Þessar þrjár voru erfiðar og voru látnar fara til að halda vinnufrið,“ segir Haraldur en nánar má lesa um málið á Vísir.is.
