Handknattleikslið ÍBV varð fyrir blóðtöku á laugardaginn í sigurleiknum á Val í Olísdeild karla. Örvhenta skyttan, Ásgeir Snær Vignisson, sem kom til liðsins í sumar frá Val, fór úr hægri axlarlið í leiknum sem ÍBV vann, 28:24. Fyrir vikið leikur Ásgeir Snær ekki með ÍBV-liðinu á næstunni.
Kristinn Guðmundsson, annar þjálfari ÍBV, staðfesti þetta við handbolta.is í dag.
„Við vitum ekki enn hve alvarlegt þetta er. En við búum okkur undir að Ásgeir gæti þurft að fara í aðgerð. Fyrsta skrefið er að fá tíma hjá sérfræðilækni til þess að fá vandaða og ítarlega skoðun,“ sagði Kristin og bætti við að alveg væri óvíst hversu lengi Ásgeir Snær verði frá keppni af þessum sökum. Það skýrðist betur þegar í ljós kemur hvort Ásgeir Snær þarf að fara í aðgerð eða ekki.
