Sex af sjö leikjum sem fram áttu að fara í kvöld í dönsku úrvalsdeildinni handknattleik í karlaflokki hefur verið frestað vegna covid smita hjá mörgum liðum deildarinnar. Danmerkur meistarar Aalborg Håndbold, sem Aron Pálmarsson leikur með og Arnór Atlason er aðstoðarþjálfari hjá, átti að sækja Holstebro heim í kvöld. Þjálfari Holstebro er farinn smitaður í einangrun og einhverjir leikmenn. Þar með náði sú viðureign ekki lengra.
Eins hefur viðureign Fredericia og SønderjyskE, sem Sveinn Jóhannnsson landsliðsmaður leikur, verið frestað vegna smita í herbúðum liðanna. Á mánudaginn var leik GOG og Skanderborg slegið á frest eftir að sex leikmenn GOG greindust með smit á sunnudaginn. Viktor Gísli Hallgrímsson landsliðsmarkvörður er liðsmaður GOG.
Eini leikur kvöldsins sem enn er á dagskrá er viðureign Bjerringbro/Silkeborg og Skjern.
Til stendur að að tvær umferðir fari fram í dönsku úrvalsdeildinni á milli jóla og nýárs. Vonir standa til að eitthvað af þeim leikjum sem þá eru fyrirhugaðir fari fram.
Ómíkrón veiran fer sem eldur í sinu um Danmörku eins og fleiri lönd um þessar mundir.
