Fjórða umferð Olísdeildar karla hófst í gærkvöldi í Hertzhöllinni á Seltjarnarnesi þar sem Afturelding vann Gróttu, 20:17. Keppni verður framhaldið í kvöld þegar þrír leikir verða flautaðir á klukkan 19.30.
Á Selfossi taka heimamenn á móti FH-ingum í Hleðsluhöllinni. Á sama tíma eiga Stjörnumenn í höggi við leikmenn KA í TM-höllinni í Garðabæ og Haukar fá Valsmenn í heimsókn í Schenkerhöllinni á Ásvöllum.
Hægt verður að fylgast með öllum leikjum í beinni útsendingu. Selfyssingar verða með streymi á selfosstv frá viðureign sinni við FH og 210tv stefnir á útsendingu frá leiknum í TM-höllinni. Viðureign Hauka og Vals verður send út á Stöð2 sport.
Enn eru miklar takmarkanir á fjölda áhorfenda og þess vegna rétt að hafa í huga fyrir þá sem annað hvort kæra sig ekki um að mæta í íþróttahúsin eða fá ekki aðgöngumiða að fylgjast með við tölvuna eða sjónvarpsskjáinn.
Síðustu leikir fjórðu umferðar fara fram á morgun. Þór Akureyri tekur á móti ÍBV í Íþróttahöllinni á Akureyri kl. 15 og Fram mætir ÍR í Safamýri kl. 17.
Rúnar Sigtryggsson er spámaður 4. umferðar Olísdeildar karla á handbolti.is. Hann fór yfir leikina eins og lesa má hér.
