Leikjum sem fram áttu að fara í þýsku 1. deildinni í kvennaflokki í dag hefur verið frestað vegna smita hjá nokkrum liðum. Þar á meðal var viðureign BSV Sachsen Zwickau sem Díana Dögg Magnúsdóttir landsliðskona leikur með. Það er þó ekki vegna smita hjá Díönu Dögg og samherjum heldur hjá andstæðingunum, Thüringer HC.
Díana Dögg staðfesti þetta við handbolta.is. Hún sagði stöðuna vera erfiða hjá mörgum liðum um þessar mundir þar sem covid færi sem eldur í sinu yfir Þýskaland. Hún sagði ennfremur að svartsýni gætti um að fyrirhugaður leikur liðsins eftir viku fari fram á þeim tíma sem til stendur.
BSV Sachsen Zwickau-liðið hefur farið af stað af krafti eftir að keppni hófst aftur eftir hlé vegna heimsmeistaramóts kvenna. Einn leikur hefur unnist og annar endað með jafntefli og er liðið komið í 12. sæti af 14 í deildinni. BSV Sachsen Zwickau kom upp í 1. deild í vor sem leið eftir aldarfjórðung í 2. deild.
