„Stórkostleg byrjun,“ sagði Gísli Þorgeir Kristjánsson í samtali við handbolta.is í kvöld eftir fjögurra marka sannfærandi sigur íslenska landsliðsins í handknattleik á Portúgal, 28:24, í fyrsta leik liðanna á EM í Búdapest í kvöld.
Gísli Þorgeir fór hamförum í sóknarleiknum. Hann reif og tætti í sig vörn portúgalska liðsins hvað eftir annað svo andstæðingurinn fékk ekki við neitt ráðið.
„Eftir allt sem á undan er gengið var hrikalega gaman að koma í höllina fyrir framan alla þessa áhorfendur og ná í ofanálag að leika mjög vel. Það er alveg hreint frábært. Við vorum svo sannarlega ekki að grínast fyrir leikinn,“ sagði Gísli Þorgeir glaður í bragði og undirstrikaði að talið um að andinn væri góður innan hópsins og allir væri klárir í slaginn var ekki orðin tóm.
„Eftir að við komumst yfir þá var eiginlega enginn hætta. Við mjötluðum áfram jafnt og þétt. Aginn var fyrir hendi, sama hvað gekk á þá greip aldrei um sig örvænting. Við bara gerðum þetta allt saman mjög vel,” sagði Gísli Þorgeir og bendir á að munurinn á leiknum í kvöld og viðureigninni á HM fyrir ári var sú að nú tók íslenska liðið völdin. Náði að stýra hraðanum betur en þá.
„Næst á dagskrá er að búa sig undir leik við Holland á sunnudaginn. Eftir sannfærandi sigur Hollendinga á Ungverjum í gær þá held ég að menn hafi áttað sig á þeir eru með gott lið. Við erum í þeim sporum núna að verða að fylgja þessum sigri eftir. Við megum ekki lenda í því sama og á EM fyrir tveimur árum þegar við unnum Dani í fyrsta leik en tókst ekki að fylgja sigrinum eftir,“ sagði Gísli Þorgeir Kristjánsson, landsliðsmaður í handknattleik eftir frábæran leik sinn í MVM Dome í kvöld.
