- Auglýsing -
- Óskar Ólafsson skoraði þrjú mörk fyrir Drammen og Viktor Petersen Norberg tvö er liðið tapaði í heimsókn sinni til Arendal í norsku úrvalsdeildinni í handknattleik í gær, 32:30. Drammen situr þar með í fimmta sæti deildarinnar með sjö stig en á leik inni. Arendal er í öðru sæti með níu stig. Elverum er eins og stundum áður á toppnum með fullt hús stiga, 12, eftir sex leiki.
- Forsvarsmenn Þýskalandsmeistara THW Kiel bíða með öndina í hálsinum eftir að endanleg niðurstaða fæst í meiðsli norsku stórstjörnunnar Sandor Sagosen. Hann meiddist á hásin á 43. mínútu í leik Kiel og Erlangen í þýsku 1.deildinni í gær. Óttast er að meiðslin kunni að vera alvarleg og Sagosen verði lengi frá keppni. Þegar er ljóst að önnur stjarna liðsins, Nikola Bilyk verður frá keppni fram á næsta sumar vegna krossbandslits.
- Fleira gekk á í leiknum hjá Kiel í gær því fyrirliðinn Domagoj Duvnjak fékk rautt spjald á 23. mínútu og kom þar af leiðandi ekkert meira við sögu. Hann verður engu að síður klár í slaginn í næsta leik Kiel sem verður við TSV Hannover-Burgdorf annað kvöld. Stutt er á milli í upphafi þýsku 1. deildarinnar sem hófst á fimmtudaginn.
- Danskir fjölmiðlar halda því fram að hinn ungi sænski handknattleiksmaður Oskar Sunnefeldt verði leikmaður Kiel á næstu dögum. Sunnefeldt hefur slegið gegn hjá SönderjyskE síðasta árið. Hann er sagður eiga að fylla í skarðið sem Bilyk skilur eftir sig.
- Auglýsing -
