Kristján Örn Kristjánsson átti mjög góðan leik fyrir PAUC, Aix, í kvöld þegar lið hans vann sinn fyrsta leik í frönsku 1. deildinni í handknattleik þegar það sótti Istres heim, lokatölur 27:21.
Kristján Örn var markahæstur hjá PAUC. Hann skoraði sex mörk og brást aðeins bogalistin í einu skoti. Hann hefur þar með skorað 13 mörk í tveimur fyrstu leikjum sínum fyrir liðið sem hann gekk til liðs við í sumar frá ÍBV.
PAUC var tveimur mörkum yfir að loknum fyrri hálfleik, 13:11.
Þetta var fyrsta tap Istres í deildinni á leiktíðinni en liðið hefur nú lokið þremur leikjum.
PAUC er með með tvö stig eftir tvo leiki. PAUC átti að leika á föstudagskvöld við Montpellier en viðureigninni var frestað.
Önnur úrslit í frönsku 1. deildinni í kvöld:
Cesson Rennes – Tremblay 28:28
Chambery – Limoges 29:32
St Raphaël – PSG 23:37
