Tvö efstu lið dönsku úrvalsdeildarinnar, Aalborg Håndbold og GOG, skildu jöfn, 33:33, í Álaborg í dag, í sannkölluðum stórleik Danmerkurmeistaranna og bikarmeistaranna.
Viktor Gísli Hallgrímsson og félagar í GOG voru fimm mörkum yfir að loknum fyrri hálfleik, 19:14. Eins voru þeir með tveggja marka forskot þegar ríflega 10 mínútur voru til leiksloka. Lokakaflinn var æsilega spennandi og skiptust liðin á um að vera marki yfir. Mathias Gidsel kom GOG yfir, 33:32, með marki eftir hraðaupphlaup 26 sekúndum fyrir leikslok.
Buster Juul jafnaði metin úr vítakasti fyrir Aalborg framhjá Viktori Gísla þegar leiktíminn var liðinn.
Viktor Gísli varði 7 skot í markinu þann hluta leiksins sem hann stóð vaktina. Var hann með liðlega 30% hlutfallsmarkvörslu.
Arnór Atlason, fyrrverandi landsliðsmaður, er aðstoðarþjálfari Aalborg Håndbold.
Þar með tapaði Aalborg Håndbold sínu fyrsta stigi í deildinni á leiktíðinni eftir tíu sigurleiki í röð í úrvalsdeildinni og í Meistaradeild Evrópu. Liðið hefur 15 stig eftir 8 leiki. GOG er með 12 stig en hefur leikið einum leik færra.
Staðan í dönsku úrvalsdeild karla.
