Áfram heldur sigurganga IFK Kristianstad í sænsku úvaldsdeildinni í handknattleik og annan leikinn í röð vann Kristianstad-liðið hnífjafna viðureign á síðustu sekúndum.
Teitur Örn Einarsson skoraði þrjú mörk og átti sex stoðsendingar í dag og Ólafur Andrés Guðmundsson, fyrirliði, skoraði í tvígang og átti tvær stoðsendingar þegar IFK vann Aranäs á útivelli, 27:26. Tæpari gat sigurinn vart verið en leikmenn Aranäs lögðu allt í sölurnar og létu það ekki hafa áhrif á sig að vera mun neðar í stöðutöflunni.
Kristianstad hefur þar með 12 stig að loknum sex leikjum og er eina taplausa lið sænsku úrvalsdeildarinnar. Ystads IF er næst með 9 stig eftir sjö leiki og Aron Dagur Pálsson og samherjar í Alingsås eru í þriðja sæti með 9 stig eftir sex leiki. Þeir léku ekki í dag.
Daníel Freyr Andrésson og samherjar í Guif frá Eskilstuna er fallnir niður í níunda sæti með sex stig eftir sjö leiki. Þeir töpuðu í dag fyrir Lugi í Lundi, 38:29. Daníel Freyr stóð í marki Guif hluta leiksins og varði 6 skot, sem gerði ríflega 21 % hlutfallsmarkvörslu.
