Nú er búið að „dæma mig“ aftur út úr mótinu og í einangrun út frá CT gildum síðustu PCR prófa. Ég má því ekki taka þátt í leiknum okkar gegn Svartfjallalandi á eftir, segir Björgvin Páll Gústavsson, landsliðsmarkvörður ómyrkur í máli á Facebook-síðu sinni fyrir stundu. Hann rekur stöðu sína sem hann er skiljanlega afar ósáttur við. Lýkur hann pistli sínum á orðunum, „Velkominn í leikhús fáránleikans, EM 2022.“
Hann segir reglur mótsins séu strangari og hafnar yfir landslög í Ungverjalandi en samkvæmt lögum ætti hann að vera laus úr einangrun átta dögum eftir að hafa smitast.
Björgvin segir að HSÍ gæti afskráð sig sem leikmana á mótinu og honum væri þá heimilt að vera á meðal áhofenda og öskrað úr sér lungum. Hann megi hinsvegar ekki vera inni á leikvellinum.
„Þetta er allt saman sérstaklega þreytandi og furðulegt þar sem að ég hef verið fullfrískur frá degi eitt, einkennalaus, þríbólusettur og losnaði úr einangrun fyrir 2 dögum síðan með CT gildi uppá 38,1 á 5. degi í einangrun. Velkominn í leikhús fáránleikans, EM 2022. Þangað til næst… Áfram Ísland!“
