Handknattleiksfólk hér á landi hefur orðið á vegi kórónuveirunnar síðustu daga eins og margir aðrir. Að minnsta kosti eru leikmenn þriggja liða í einangrun um þessar mundir eftir að hafa smitast, samkvæmt því sem handbolti.is kemst næst.
Fimm leikmenn karlaliðs HK greindust fyrir og um síðustu helgi með kórónuveiruna og eru í eingangrun. Eins mun einn leikmaður karlaliðs Víkings vera í sömu stöðu og annar er í sóttkví.
Gunnar Magnússon, þjálfari karlaliðs Aftureldingar sagði í samtali við Seinni bylgjuna og vísi.is í gærkvöld að einn leikmaður í hans herbúðum væri smitaður og í einangrun. Auk þess væru tveir í sóttkví. Gunnar sagði í skilaboðum til handbolta.is í dag að tvímenningarnir væru um það bil að ljúka vist sinni í sóttkví.
Engar æfingar eru hjá handknattleiksliðum á höfuðborgarsvæðinu um þessar mundir og hafa ekki verið í meira en viku. Litlar líkur er á að þráðurinn verði tekinn upp á ný á næstunni, hvorki við æfingar né keppni ef ráða má í orð sóttvararnalæknis í dag.
