Ómar Ingi og Elvar Örn bestir hjá HBStatz

Ómar Ingi Magnússon var besti leikmaður íslenska landsliðsins á Evrópumeistararmótinu í handknattleik. Það er a.m.k. niðurstaða tölfræðiveitunnar HBStatz sem tekið hefur saman tölfræði um marga þætti í þeim átta leikjum sem íslenska landsliðið lék á mótinu.

Ómar Ingi var jafnframt besti sóknarmaður íslenska liðsins og þarf vart að koma á óvart en hann er afar líklegur til þess að verða markahæsti leikmaður Evrópumótsins.

Elvar Örn Jónsson var að mati HBStatz besti varnarmaður íslenska liðsins á mótinu.

Til viðbótar valdi HBStatz sinn uppáhalds leikmann. Fyrir valinu varð Eyjamaðurinn Elliði Snær Viðarsson sem því miður missti af tveimur síðustu leikjum íslenska landsliðsins eftir hafa verið einn ellefu leikmanna liðsins sem smitaðist af kórónuveirunni.