Mætt á völlinn eftir sex ára fjarveru vegna höfuðhöggs

Handknattleikskonan Anna Katrín Stefánsdóttir lék á ný með meistaraflokksliði Gróttu í gærkvöld eftir að hafa verið úr leik í rúm sex ár eftir að hafa fengið þungt högg á gagnaugað á æfingu undir lok ársins 2015. Fékk hún þá olnboga frá æfingafélaga sínum í gagnaugað. Endurkomu Önnu á leikvöllinn er fagnað á Facebooksíðu handknattleiksdeildar Gróttu.

Anna Katrín kom fyrst inn í meistaraflokk Gróttu keppnistímabilið 2015/2016, síðara árið af tveimur í röð þegar Grótta varð Íslandsmeistari í kvennaflokki. Þótti Anna Katrín efnileg á handknattleiksvellinum. Hún hafði þá burði til að leika í báðum hornum og hafði einstaklega gott lag á „kringla“ sér inn úr hægra horninu þótt hennar eftirlætisstaða hafi verið og sé vinstra hornið.

Grótta stöðvaði sigurgöngu ÍR-inga