Eftir fjóra tapleiki í röð í Olísdeild kvenna komst Valur inn á sigurbraut á nýjan leik í dag með sigri á Aftureldingu, 37:21, á Varmá í Mosfellsbæ. Valur hafði átta marka forskot að loknum fyrri hálfleik, 17:9.
Valur situr áfram í öðru sæti deildarinnar með 18 stig. Liðið er þremur stigum á eftir Fram sem á leik til góða. KA/Þór og Haukar eru næst á eftir en leikjadagskrá Olísdeildarinnar hefur raskast mjög upp á síðkastið vegna veirunnar sem leikur lausum hala.
Um er að ræða annan af tveimur leikjum sem fram fara í deildinni í dag en kl.18 eigast við Haukar og HK á Ásvöllum.
Eins og tölurnar gefa til kynna var mikill munur á liðunum á Varmá í dag enda staða þeirra afar ólík í deildinni. Afturelding er neðst án stiga. Eins og stundum áður var varnarleikur Aftureldingarliðsins ekki góður og áttu leikmenn Vals greiða leið að markinu eins og markafjöldinn gefur til kynna. Markverðirnir voru fyrir vikið ekki í öfundsverðu hlutverki.
Leikmenn Aftureldingar héldu þó áfram að gera sitt besta til þess að veita Valsliðinu keppni.
Mörk Aftureldingar: Sylvía Björt Blöndal 7/1, Katrín Helga Davíðsdóttir 5, Susan Ines Gamboa 4, Telma Rut Frímannsdóttir 2, Brynja Rögn Fossberg Ragnarsdóttir 1, Margrét Björg Castillo 1, Jónína Hlín Hansdóttir 1.
Varin skot: Eva Dís Sigurðardóttir 3, 13% – Tanja Glóey Þrastardóttir 1, 8,3%.
Mörk Vals: Mariam Eradze 10, Lovísa Thompson 9, Þórey Anna Ásgeirsdóttir 4/1, Thea Imani Sturludóttir 4, Hanna Karen Ólafsdóttir 2, Auður Ester Gestsdóttir 2, Hildur Björnsdóttir 2, Hildigunnur Einarsdóttir 1, Elín Rósa Magnúsdóttir 1, Berglind Gunnarsdóttir 1, Sara Sif Helgadóttir 1.
Varin skot: Saga Sif Gísladóttir 12, 42,9% – Sara Sif Helgadóttir 7, 63,6%.
Stöðu og næstu leiki í Grill66-deild kvenna má sjá hér.
