- Auglýsing -
- Óskar Ólafsson skoraði eitt mark og hinn hálf íslenski Viktor Petersen Norberg þrjú þegar lið þeirra Drammen vann Nærbø, 37:31, í norsku úrvalsdeildinni í handknattleik í gær. Drammen er í öðru sæti deildarinnar með 28 stig eftir 17 leiki, sex stigum á eftir Orra Frey Þorkelssyni og félögum í Elverum sem unnu Kolstad á laugardaginn eins og áður hefur verið greint frá á handbolta.is.
- Íslendingaliðið og Danmerkurmeistarar Aalborg Håndbold vann bikarmeistara Mors-Thy, 37:32, á heimavelli í dönsku úrvalsdeildinni í handknattleik í gær. Aron Pálmarsson var fjarverandi vegna meiðsla. Arnór Atlason, aðstoðarþjálfari Álaborgarliðsins var að vanda til halds og trausts. Aalborg er í öðru sæti deildarinnar með 29 stig eftir 19 leiki, er sex stigum á eftir Viktori Gísla Hallgrímssyni og félögum í GOG sem tróna á toppnum.
- Fredrikstad Bkl., liðið sem Elías Már Halldórsson þjálfar í norsku úrvalsdeild kvenna í handknattleik tapaði í gær fyrir Aker Topphåndball, 24:20, á útivelli. Fredrikstad Bkl. er í 11. sæti af 14 liðum deildarinnar með 12 stig eftir 16 leiki.
- Storhamar, liðið sem Axel Stefánsson þjálfar, tapaði á heimavelli í fyrradag fyrir Herning-Ikast, 32:34, í Evrópudeildinni í handknattleik kvenna. Storhamar er í þriðja sæti með tvö stig eftir fjóra leiki í C-riðli keppninnar.
Sonur Axels, Magnús Orri, var í sigurliði Viking Håndbold í gær þegar liðið lagði Stavanger, 32:24, í 1. deild karla í handknattleik. Magnús Orri skoraði ekki mark. Liðið er í þriðja sæti deildarinnar með 15 stig eftir 11 leiki, er þremur stigum á eftir Sandnes sem er á toppnum.
- Auglýsing -
