Ekkert fararsnið er á Roland Eradze frá Úkraínu en hann er einn nokkurra Íslendinga sem býr í Úkraínu um þessar mundir. Roland er í borginni Zaporizhia í suðurhluta landsins. Þar vinnur hann sem þjálfari hjá handknattleiksliðinu Motor sem er landsmeistari og einnig þátttakandi í Meistaradeild Evrópu og í Austur Evrópudeildinni.
Roland sagði við handbolta.is í morgun að hann hafi ekki í hyggju eins og stendur að yfirgefa landið þrátt fyrir að talin sé hætta á innrás rússneska hersins inn í Úkraínu á næstu dögum. Roland telur að hætta á innrás sé ofmetin.
„Ég verð hér áfram enda trúir enginn að af innrás Rússa verði,“ sagði Roland við handbolta.is. „Mesta spennan er í fjölmiðlum,“ sagði Roland ennfremur og bætti við að þótt Rússum væri trúandi til eins og annars þá gengju þeir vart svo langt að ráðast inn í Úkraínu sem væri sjálfstætt ríki.
Roland er fæddur og uppalinn í Georgíu en flutti til Íslands með fjölskyldu sinni um aldamótin. Að Roland undanskildum er fjölskylda hans hér á landi. Dóttir hans, Mariam, leikur handknattleik með Val.
Roland, sem lék handknattleik og þjálfaði hér á landi um árabil til viðbótar við að leika með íslenska landsliðinu og koma að þjálfun þess, hefur unnið hjá Motor frá sumrinu 2020 er hann kom inn í þjálfarateymið um leið og Íslandsvinurinn Savukynas Gintaras, sem er Litái, var ráðinn aðalþjálfari meistaraliðsins.
