Heilbrigðisráðuneytið hefur veitt Handknattleikssambandi Íslands undanþágu vegna æfinga og tveggja leikja í undankeppni EM2022 í karlaflokki í byrjun nóvember. Róbert Geir Gíslason staðfestir þetta við handbolta.is í dag.
Leikirnir verða við Litháen 4. nóvember í Laugardalshöll og gegn Ísrael á sama stað þremur dögum síðar. Undanþágan nær einnig til æfinga vegna leikja frá og með 2. nóvember.
„Þungu fargi er af okkur létt að undanþágan hefur verið staðfest og erum við þakklátir fyrir hana,“ sagði Róbert Geir við handbolta.is.
„Næst er að bretta upp ermar og halda áfram af fullum krafti við undirbúning vegna komu liðanna við framkvæmd leikjanna. Við munum að sjálfsögðu í einu og öllu leggja okkur fram um að mæta öllum kröfum sem gerðar eru til okkur bæði af hálfu sóttvarnayfirvalda hér á landi sem og mæta þeim kröfum sem gerðar eru af hálfu Handknattleikssambands Evrópu, EHF, vegna sóttvarna í kringum landsleiki. Meðal þessa er að liðin verða öll í svokallaðri vinnustaðasóttkví hér á landi,“ sagði Róbert Geir Gíslason, framkvæmdastjóri Handknattleikssambands Íslands.
Leikirnir verða þeir fyrstu hjá íslenska landsliðinu í undankeppni EM.
Upphaflega stóð til að leikurinn við Ísrael færi fram í Tel Aviv en vegna útgöngubanns í Ísrael var ekki hægt að koma leiknum við þar í landi. HSÍ samþykkti þess vegna að skipta á leikdögum við Ísraelsmenn.
