Ólafur Andrés Guðmundsson, fyrirliði IFK Kristianstad, hefur orðið að draga sig út úr íslenska landsliðinu í handknattleik sem kemur saman eftir helgi til æfinga og tveggja leikja í undankeppni EM 2022. Ólafur Andrés staðfesti þetta við handbolta.is í morgun.
Ólafur Andrés tognaði í aftanverðu læri í fyrri hálfleik í viðureign IFK og Guif í sænsku úrvalsdeildinni á síðasta sunnudag. „Um er að ræða litla tognun aftan í læri. Vonandi verð ég ekki lengur en tvær vikur frá,“ sagði Ólafur Andrés við handbolt.is. „Ég verð vonandi klár í slaginn fljótlega eftir landsliðspásuna,“ sagði Ólafur Andrés ennfremur en hann nýtur aðhlynningar hjá félagi sínu.
Af þessum sökum tók Ólafur Andrés ekki þátt í viðureign IFK og Dinamo Búkarest í annarri umferð B-riðils Evrópudeildarinnar í gærkvöld. IFK vann leikinn með yfirburðum, 31:22, og fagnaði þar með sínum fyrsta sigri í deildinni.
