Guðmundur Þórður Guðmundsson, landsliðsþjálfari karla í handknattleik, hefur kallað inn tvo leikmenn í landsliðshópinn sem mætir Litháen í undankeppni EM 2022 í Laugardalshöll á miðvikudaginn.
Um er að ræða Kristján Örn Kristjánsson, Donna, sem leikur með PAUC í Frakklandi og Valsarann Magnús Óla Magnússon.
Donni og Magnús Óli koma í stað Ólafs Andrésar Guðmundssonar og Arnórs Þór Gunnarssonar. Ólafur Andrés er meiddur eins og kom fram á handbolti.is í gær og Arnór Þór á ekki heimangengt af persónulegum ástæðum.
Donni gekk til liðs við PAUC í sumar frá ÍBV. Hann hefur farið vel af stað með liðinu og skorað 17 mörk í þremur leikjum. Einnig hefur Donni einu sinni verið valinn í lið umferðarinnar af franska íþróttablaðinu L’Equipe. Vegna kórónuveirunnar hefur lið hans ekki leikið fleiri leiki það sem af er leiktíðar. Viðureignirnar þrjár eru allar á útivelli.
Magnús hefur skorað 27 mörk í fjórum leikjum fyrir Val í Olísdeildinni á keppnistímabilinu. Hann var valinn í landsliðið vorið 2019 en varð að draga sig úr hópnum vegna meiðsla.
