Óðinn Þór kallaður heim

Óðinn Þór Ríkharðsson, hornamaður danska úrvalsdeildarliðsins TTH, hefur verið valinn í íslenska landsliðið í handknattleik karla fyrir leikinn gegn Litháen.

Handknattleikssamband Íslands var rétt í þessu að staðfesta frétt handbolta.is frá því fyrir um hálftíma að Kristján Örn Kristjánsson, Donni, hafi dregið sig út úr landsliðshópnum eftir að kórónuveirusmit greindist innan hans liðs í Frakklandi í dag.

Leikurinn við Litháen verður í Laugardalshöll á miðvikudagskvöld. Hann er liður í undankeppni EM2022 og verður fyrsti leikur liðanna í undankeppninni. Engir áhorfendur mega vera á leiknum en hann verður sýndur í beinni útsendingu á RÚV.