„Ég er mjög ánægður. Það er mikill heiður að vera kallaður inn í landsliðið,“ sagði Orri Freyr Þorkelsson, hornamaður Hauka, við handbolta.is í dag eftir að hann var valinn í íslenska landsliðið í handknattleik í morgun eftir að Bjarki Már Elísson varð að draga sig út úr hópnum, nánast á elleftu stundu, skömmu áður en hann hélt frá Þýskalandi til Íslands.
Þar með er ljóst að tveir ungir og efnilegir leikmenn úr Olísdeildinni deila með sér stöðu vinstri hornamanns í leiknum við Litháen á miðvikudagskvöld. Á föstudaginn var Eyjamaðurinn Hákon Daði Styrmisson valinn í landsliðið eftir að Oddur Gretarsson heltist úr lestinni.
„Enn meira kom það mér á óvart að vera valinn á þessum tímapunkti,“ sagði Orri Freyr ennfremur en hann lék afar vel með Haukum í þeim fáu leikjum sem var lokið í Olísdeildinni þegar keppninni var skellt í lás fyrir mánuði.
Leikurinn sem fer fram við einstakar aðstæður að fenginni undanþágu heilbrigðisyfirvalda mun fara fram án áhorfenda og við ströngustu skilyrði um sóttvarnir.
„Það eru forréttindi að fá að æfa og spila handbolta á þessum tímum. Ég er mjög spenntur fyrir þessu,“ sagði Orri Freyr ennfremur sem kominn er í vinnusóttkví með landsliðsmönnum á hóteli í Reykjavík eftir að hafa gengist undir skimun fyrir kórónuveiru.
Fyrsta æfingin verður í fyrramálið, einnig undir afar ströngum skilyrðum sóttvarna. Gunnar Magnússon, aðstoðarlandsliðsþjálfari mun stýra æfingunni.
,
