Sænska handknattleiksliðið IFK Kristianstad sem landsliðsfólkið Ólafur Andrés Guðmundsson, Teitur Örn Einarsson og Andrea Jacobsen leika með, tapaði miklum peningum vegna covid19 veirunnar eins og önnur handknattleiksfélög víða um heim. Fram kom í ársuppgjöri félagsins, sem birt var í lok ágúst, að félagið hafi orðið af a.m.k. 35 milljóna króna tekjum vegna þess að úrslitakeppnin var slegin af vegna farsóttarinnar.
IFK Kristianstad hefur notið mikillar velgengni á undanförum árum sem hefur skilað sér í mikilli aðsókn á heimaleikjum karlaliðsins. Nær undantekningalaust er uppselt á heimaleiki. Keppnishöll liðsins rúmar 5000 áhorfendur í sæti.
Hluti tapsins var veginn upp með 23 milljóna styrk frá sænska ríkinu en það styrkti myndarlega við bakið á íþróttalífi landsins í þeim erfiðleikum sem gengu yfir í vor og sumar og ekki er alveg séð fyrir endann á.
IFK Kristianstad stendur vel að vígi fjárhagslega þrátt fyrir talsvert tap á síðasta keppnistímabili. Félagið á jafnvirði 75 milljóna króna á bankabók sem hægt er að grípa til í þeim tilgangi að halda félaginu á floti um skeið.
