Kári Garðarsson, þjálfari kvennaliðs Gróttu i Grill 66-deildinni, segir að síðustu vikur hafi gengið vel þótt gjörbreyta hafi þurft æfingaáætlunum eftir að gert var hlé á keppni á Íslandsmótinu og innanhússæfingar óheimilar. Mikil áhersla hafi verið lögð á hlaup, spretti og styrk eftir forskrift frá styrktarþjálfara.
Kári viðurkennir þó að núverandi ástand sé farið að reyna á þolrifin hjá öllum en áfram verði að þreyja þorrann. Allir í kringum Gróttuliðið ætli að koma sterkari til baka þegar loksins verður heimilað að keppa á nýjan leik, hvenær sem það verður.
Langar inn á parketið
Pressan á að hefja keppni sé minni í Grill 66-deild kvenna þar sem færri umferðir verði leiknar í deildinni en t.d. í Olísdeildinni. En vissulega langi alla að komast inn á parketið á nýjan leik.
Handbolti.is sendi Kára, eins og fleiri þjálfurum í Olís,- og Grill 66-deildunum nokkrar spurningar og eru svör hans hér að neðan.
Hvernig hefur gengið að halda leikmönnum við efnið síðustu vikur?
„Það hefur gengið nokkuð vel. Við höfum byggt æfingarnar upp með Zoom æfingum undir stjórn Þórs styrktarþjálfara félagsins og svo voru stelpurnar einnig að æfa sjálfar bæði hlaup, spretti og styrk með prógömmum frá Þór. Við Davíð aðstoðarþjálfari höfum einnig fundað með stelpunum í gegnum Zoom til að fara yfir stöðuna á mannskapnum. Það var fínt að geta hitt mannskapinn þessa rúmu einu viku sem það var leyfilegt og aðeins komast í bolta.“
Verðum að láta okkur hafa það
Hvernig horfir þú til næstu vikna sem þjálfari?
„Áfram heldur sama upplegg, þ.e. Zoom fundir og æfingar í bland við það að leikmenn æfa sjálfar. Það verður að viðurkennast að þetta er ansi þreytt ástand en við verðum bara að láta okkur hafa það, standa vaktina og koma eins vel út úr þessu æfingabanni og hægt er.“
Stórsigur að spila fyrir jól
Er eitthvað hægt að velta framhaldinu fyrir í sér í deildarkeppninni meðan óljóst er hvenær verður hægt að hefja æfingar af einhverjum krafti?
„Það má án efa velta ýmsum sviðsmyndum fyrir sér. Ég held að það yrði stórsigur að ná að spila eitthvað fyrir jól. Umferðirnar í Grilldeild kvenna eru þó nokkuð færri en í t.d. Olís deild kvenna. Pressan er því minni þar en auðvitað viljum við komast inn á parketið sem fyrst og sem fyrst aftur í leiki.“
Hvaða áhrif getur ástand síðustu vikna, þ.e. leikir takmarkaðir og jafnvel litlar æfingar, haft á framhaldið hjá liðum í Grillinu, svona heilt yfir?
„Það er erfitt að segja. Þetta er náttúrulega búið að vera mjög rysjótt alveg frá því síðastliðið vor. En ég held að flest liðin verði tiltölulega fljót að rifja upp það sem búið var að fara yfir í sumar og haust og koma sér aftur í gírinn.“
