Byrjaði með sigri

Erlingur Richardsson og lærisveinar hans í hollenska landsliðinu byrjuðu undankeppni EM í handknattleik karla í gærkvöldi með naumum sigri á Tyrkjum, 27:26, í Almere í Hollandi en liðin eru í 5. riðli ásamt Slóvenum og Pólverjum.

Það blés ekki byrlega framan af fyrir hollenska liðinu. Það var fjórum mörkum undir að loknum fyrri hálfleik. Í síðari hálfleik snerist taflið við.

Hollendingar áttu að mæta Pólverjum um helgina en leiknum var frestað vegna kórónuveirunnar sem sótt hefur í sig veðrið í Póllandi. Eins var leik Pólverja og Slóvena í gærkvöld slegið á frest. Slóvenar sækja Tyrki heim á sunnudag.