- Auglýsing -
- Helena Rut Örvarsdóttir leikur í kvöld sinn 50. landsleik þegar íslenska landsliðið mætir sænska landsliðinu í undankeppni EM í handknattleik á Ásvöllum. Andrea Jacobsen tekur þátt í sínum 30. A-landsleik.
- Þórey Rósa Stefánsdóttir á flesta landsleiki að baki af leikmönnum íslenska liðsins sem taka þátt í leiknum í kvöld, 111. Auk Þóreyjar hafa Rut Arnfjörð Jónsdóttir og Karen Knútsdóttir einnig rofið 100 leikja múrinn. Rut á 106 leiki og Karen 104.
- Frítt er inn á leikinn á Ásvöllum í kvöld í boði Icelandair. Flautað verður til leiks klukkan 19.45. Í fyrramálið heldur íslenska landsliðið til Zrenjanin í Serbíu þar sem leikið verður við serbneska landsliðið í lokaumferð riðlakeppni EM. Um hreinan úrslitaleik verður að ræða um farseðil á Evrópumótið sem fram fer í nóvember.
- Franska handknattleiksliðið Montpellier hefur keypt Stas Skube undan samningi hjá pólska meistaraliðinu Vive Kielce. Af þeim sökum hefur Skube skrifað undir þriggja ára samning við franska stórliðið og verður þar með samherji Ólafs Andrésar Guðmundssonar frá og með næsta keppnistímabili.
- Lugi, sem hafnaði í áttunda sæti í sænsku úrvalsdeildinni í handknattleik karla á dögunum hafa komið skemmtilega á óvart í úrslitakeppninni. Þeir hafa unnið deildarmeistara Sävehof í tvígang, síðast í gærkvöld með fjögurra marka mun, 30:26, á heimavelli í Lundi. Staðan er jöfn í rimmunni, hvort lið hefur tvo vinninga. Oddaleikur verður í Partille á föstudaginn. Lugi liðið er til alls víst því það hefur unnið einn leik í rimmunni í Partille, heimavelli Sävehof.
- Auglýsing -
