- Auglýsing -
„Það er kominn nettur fiðringur í mann enda má maður vænta þess að stemningin verður mikil á leiknum,” sagði Unnur Ómarsdóttir landsliðskona í handknattleik í samtali við handbolta.is í Zrenjanin í Serbíu spurð út í úrslitaleikinn við Serba í lokaumferð undankeppni Evrópumótsins í handknattleik í dag.
„Við verðum að einbeita okkar að eigin leik og leiða lætin hjá okkur en það getur orðið rosalegur hávaði. Þetta er massagryfja,” sagði Unnur og vitnar m.a. til upptöku á leik Serba og Svía sem fram fór í byrjun mars. Þá voru liðlega 2.000 áhorfendur viðstaddir. Þeir lágu ekki á liði sínu. Reikna má með að svipað verði upp á teningnum í dag enda um að ræða úrslitaleik fyrir bæði íslenska og serbneska liðið í uppgjöri um sæti í lokakeppni EM.
„Við megum ekki vanmeta serbneska liðið þótt við höfum unnið það síðast. Serbar unnu Svía hér í Zrenjanin í mars sem sýnir styrk liðsins á heimavelli. Okkur langar hinsvegar svo mikið í að vinna og komast á EM að við munum leggja okkur fullkomlega í verkefnið í dag. Það er engin spurning.
Við höfum trú á að geta unnið en það er líka ljóst að til þess þarf allt að ganga upp. Serbar hafa verið fastagestir á stórmótum á sama tíma og liðið hafa tíu ár frá síðasta stórmóti okkar. Hungrið og trúin er fyrir hendi,” sagði Unnur Ómarsdóttir landsliðskona í samtali við handbolta.is.
Unnur leikur sinn 38. landsleik í dag.
Handbolti.is er í Zrenjanin og fylgist með leiknum í stöðu- og textalýsingu úr kristalshöllinni frá klukkan 16.
- Auglýsing -
