- Auglýsing -
- Haukur Þrastarson skoraði tvö mörk fyrir pólska meistaraliðið Łomża Vive Kielce þegar það vann MKS Zagłębie Lubin með átta marka mun á útivelli, 32:24, í pólsku úrvalsdeildinni í handknattleik í gær. Þetta var 24. sigur Łomża Vive Kielce í deildinni á leiktíðinni.
- Grétar Ari Guðjónsson varði 11 skot, þar af 1 vítakast í 14 marka sigri Nice á Angers í frönsku 2. deildinni í handknattleik í gærkvöld. Hafnfirðingurinn var með 39% hlutfallsmarkvörslu en hann stóð ekki í marki Nice allan leikinn. Nice er í sjöunda sæti 2. deildar þegar þrjár umferðir eru eftir með 31 stig, er tveimur stigum á eftir Sélestat, Dijon og Tremblay sem sitja í fjórða til sjötta sæti. Sex efstu liðin taka þátt í umspili um sæti í efstu deild á næsta keppnistímabili.
- Hannes Höskuldsson handknattleiksmaður hjá Selfossi handarbrotnaði í annarri viðureign Selfoss og FH í átta liða úrslitum Olísdeildarinnar fyrr í vikunni. Hann var ekki með gegn FH í fyrrakvöld og verður áfram úr leik.
- Elvar Ásgeirsson skoraði fimm mörk fyrir Nancy þegar liðið tapaði fyrir Montpellier í frönsku 1. deildinni í handknattleik í gærkvöld. Nancy rekur lestina í deildinni. Ólafur Andrés Guðmundsson var ekki í leikmannahópi Montpellier.
- Tumi Steinn Rúnarsson skoraði eitt mark fyrir Coburg þegar liðið mætti DJK Rimpar Wölfe og tapaði, 25:23, í þýsku 2. deildinni í handknattleik í gær. Coburg situr í 14. sæti af 20 liðum með 28 stig eftir 30 leiki og á liðið átta viðureignir eftir.
- Serbneska handknattleikskonan Andrea Lekić kveður Krim Ljubljana eftir leiktíðina og flytur til Búdapest þar sem hún hyggst leika með FTC (Ferencvaros) næstu tvö ár. Hún þekkir til í Ungverjalandi eftir að hafa leikið með Györ frá 2011 til 2013.
- Auglýsing -
