- Auglýsing -
Útlendu handknattleiksmennirnir Tomislav Jagurinoski og Josip Kezic leika ekki með Þór Akureyri í Grill66-deildinni á næsta keppnistímabili. Þór greindi frá því í gær að þeir hafi yfirgefið félagið og séu ekki væntanlegir til baka á næsta keppnistímabili.
Norður Makedóníumaðurinn Jagurinoski kom til Þórs í haust rétt eftir að keppnistímabilið hófst. Honum reyndist veran á Íslandi erfið fjarri unnustu og fjölskyldu, eftir því sem segir í frétt á heimasíðu Þórs. Jagurinoski skoraði 83 mörk í 15 leikjum í Grill66-deildinni.
Króatinn Kezic gekk til liðs við Þór í upphafi þessa árs og var ekki í góðri leikæfingu. Hann sótt í sig í veðrið þegar á leið dvölina á Akureyri og átti m.a. prýðilega leiki gegn Fjölni í umspilinu.
„Stjórn handknattleiksdeildar ákvað að nýta sér ekki klásúlu í samningi um framlengingu þar sem liðið er með unga og efnilega leikmenn í stöðu leikstjórnanda og ætlum að treysta þeim til verksins næsta tímabil,“ segir orðrétt í frétt á heimasíðu Þórs.
- Auglýsing -
