Hið árlega SparkassenCup mót unglingaliða karla hefur verið aflýst að þessu sinni en til stóð að halda það á milli jóla og nýárs, eins og verið hefur árlega frá 1987. Útilokað er að halda mótið vegna ástands sem ríkir á tímum kórónuveirunnar og þeirrar óvissu sem ríkir í dag um ferðalög á næstu vikum. „Við vorum bjartsýn um að geta haldið mótið allt þangað til á allra síðustu dögunum þegar syrta tók í álinn með vaxandi útbreiðslu kórónuveirunnar,“ er haft eftir einum skipuleggjenda mótsins í tilkynningu á handball-world.
Fram kemur þar einnig að U19 ára landslið Íslands, Frakklands, Portúgals og Þýskalands hafi verið búin að boða komu sína. Íslensk unglingalandslið hafa tekið þátt nær árlega árum saman með góðum árangri. Þar hefur oftar en ekki verið lagður grunnur að framúrskarandi árangri unglingalandsliða Íslands á stórmótum sumarið eftir heimsóknina á SparkassenCup.
Forsvarsmenn mótsins segjast ekki vera af baki dottnir þótt þeir hafi orðið að flauta mótið af þetta árið. Undirbúningur fyrir SparkassenCup-mótið í árslok 2021 hefjist innan tíðar með von um betri tíð og blóm í haga.
