Nýliðar Harðar í Olísdeild karla hafa framlengt samninga sína við þrjá sterka leikmenn liðsins sem léku með liðinu á nýliðnum vetri. Um er að ræða Mikel Amilibia, Suguru Hikawa og Tadeo Salduna, eftir því sem fram kemur í tilkynningu handknattleiksdeildar Harðar í dag.
Sá síðarnefndi hefur verið í herbúðum Harðar í þrjú ár og hefur tekið þátt í þeirri uppbyggingu sem verið hefur á liði félagsins síðan en Hörður lék í utandeildinni fyrir þremur árum.
„Mikel kom frá Spáni og Hika kom frá Japan seinasta haust. Þeir voru virkilega góðir liðsmenn stóðu sig frábærlega í vetur.
Tadeo kom frá Argentínu fyrir 3 árum og hefur því fylgt liðinu úr neðstu deild í þá efstu! Hann er orðinn svo mikill Ísfirðingur að hann veit ekki einu sinni til hvers lyklar eru notaðir lengur,“ segir m.a. í tilkynningu handknattleiksdeildar Harðar á samfélagsmiðlum í dag.
Sigeru Hikawa skoraði 101 mark í 20 leikjum Harðar í Grill66-deildinni í vetur sem leið. Mikel Amilibia Aristi skoraði 53 mörk og og Tadeo Salduna 28 mörk.
Hörður vann Grill66-deildina í vor og leikur í Olísdeild í fyrsta sinn á næsta keppnistímabili. Um leið verður það í fyrsta sinn sem lið frá Vestfjörðum leikur í efstu deild í handknattleik.
