Tekur fram skóna og tekur upp þráðinn hjá Stjörnunni

Handknattleiksmaðurinn Jóhann Karl Reynisson hefur ákveðið að taka fram skóna eftir hlé og leika með Stjörnunni í Olísdeildinni á næsta keppnistímabili.  Jóhann Karl er öflugur línu- og varnarmaður. Hann á að fylla skarð Sverris Eyjólfssonar sem hefur ákveðið að leggja skóna á hilluna vegna þrálátra meiðsla. 

Jóhann Karl lék árum saman með Fram en gekk síðan til liðs við HK áður en hann flutti til Danmerkur og lék með Nordsjælland upp úr miðjum síðasta áratug. Eftir að Jóhann Karl flutti heim aftur til Íslands varð hann liðsmaður FH í nokkur ár þangað til hann ákvað að taka sér hvíld frá handbolta fyrir fáeinum árum. 

„Ég fagna því að fá Jóa í Garðabæinn. Hann mun styrkja okkar lið mikið, frábær varnarmaður og mikill leiðtogi. Hann er leikmaður sem ég hlakka til að vinna með og er sannfærður um að hann smellpassar inn í okkar skipulag,“ segir Patrekur Jóhannesson, þjálfari meistaraflokks karla í tilkynningu handknattleiksdeildar Stjörnunnar.

Stjarnan kynnti Jóhann Karl til leiks í dag með eftirfarandi myndskeiði.