Sara Dögg Hjaltadóttir skoraði þriðjung marka Volda þegar liðið gerði jafntefli, 21:21, við Levanger í norsku B-deildinni í handknattleik í dag en leikið var á heimavelli Levanger í Þrándheimi. Þetta er önnur helgin í röð sem leikmenn Volda leggja í langferð til Þrándheims en um síðustu helgi sótt Volda liðsmenn Charlottenlund heim.
Sara Dögg átti níu markskot í leiknum og tvær stoðsendingar. Hún var lang markahæsti leikmaður liðsins að þessu sinni.
Volda var marki undir að loknum fyrri hálfleik, 10:9. „Þetta var aðeins öðruvísi leikur en síðustu helgi,“ sagði Halldór Stefán þjálfari Volda við handbolta.is en lið hans skoraði 34 mörk fyrir viku síðan.
„Við náðum okkur aldrei í gang sóknarlega í dag en við höfum heldur ekki verið að skora eins mikið af mörkum að jafnaði í leikjum eins og við gerðum í síðasta leik,“ sagði Halldór Stefán ennfremur en með honum í þjálfarateyminu er Hilmar Guðlaugsson fyrrverandi þjálfari HK og Selfoss.
Volda er í þriðja sæti deildarinnar með 13 stig eftir níu leiki, er þremur stigum á eftir Follo sem trónir á toppnum með 16 stig að loknum tíu leikjum. Bærum er í öðru sæti með 15 stig eftir níu leiki.
Næsti leikur Volda verður 6. desember á móti toppliðinu.
