Hörður Fannar Sigþórsson og félagar í KÍF frá Kollafirði unnu STíF frá Skálum, 29:25, á heimavelli í færeysku úrvalsdeildinni í handknattleik í kvöld. KÍF hafði forystu í leiknum frá upphafi til enda og var m.a. þremur mörkum yfir í hálfleik, 13:10.
Hörður var fremur spakur í sóknarleiknum að þessu sinni og lét sér nægja að skora eitt mark. Hann var að vanda fastur fyrir í vörninni.
KÍF er í fjórða sæti deildarinnar með 11 stig eftir 11 leiki.
Arnar Gunnarsson og lærisveinar í Neistanum töpuðu fyrir H71, 31:26, á heimavelli, Höllinni á Hálsi í Þórshöfn. Staðan var jöfn að loknum fyrri hálfleik, 13:13. H71 var sterkari í síðari hálfleik og vann leikinn og heldur þar með örugglega efsta sæti deildarinnar. Finnur Hansson var ekki á meðal leikmanna Neistans í dag en var með Arnari við hliðarlínuna.
Neistin er í þriðja sæti með 12 stig að loknum 10 leikjum og er fimm stigum á eftir H71 og þremur frá VÍF frá Vestmanna sem er í öðru sæti.
KÍF fær Kyndil í heimsókn á næsta sunnudag og Neistin tekur á móti Skálamönnum í STíF.
