Pick Szeged varð ungverskur meistari í handknattleik karla annað árið í röð í gærkvöld eftir ævintýralegan eins marks sigur, 30:29, á Veszprém á heimavelli Veszprém í síðari viðureign liðanna. Liðin voru með jafna markatölu, 58:58, eftir tvo úrslitaleiki en Szeged varð meistari á fleiri mörkum skoruðum á útivelli.
Miklós Rosta skoraði sigurmarkið mikilvæga fyrir Szeged á síðustu sekúndu leiksins að loknu hraðaupphlaupi og frábærri sendingu frá Slóvenanum Dean Bombac.
Þrettán sekúndum áður var dæmdur ruðningur á leikmenn Veszprém í lokasókn liðsins. Gríðarlegur fögnuðu braust út eftir sigurinn í gær enda hefur lengi andað köldu á milli stuðningsmanna liðanna sem hafa borið höfuð og herðar yfir önnur handknattleikslið í karlaflokki í Ungverjalandi.
Síðustu sekúndur leiksins og sigurmarkið má sjá hér fyrir neðan en upptakan er fengin af Twittersíðu Danans Rasmus Boysen.
This is handball! Can you think of a more crazy way to win a championship title away versus your eternal rivals?
— Rasmus Boysen (@RasmusBoysen92) June 12, 2022
Bombac with the no-look pass to Rosta, who with a buzzerbeater secures the 5th title for @pickhandball!#handball pic.twitter.com/wIL6OzMhiT
Þar með hefur Pick Szeged orðið meistari í fimm skipti í Ungverjalandi, 1996, 2007, 2018, 2021 og 2022. Veszprém varð síðast meistari 2019 en enginn var krýndur meistari tímabilið 2020 enda varð það endasleppt vegna kórónuveirunnar.
Stefán Rafn Sigurmannsson, leikmaður Hauka, varð meistari með Pick Szeged árið 2018.
