Ólafur Andrés Guðmundsson landsliðsmaður í handknattleik er í þann mund að ganga til liðs við GC Amicitia Zürich í Sviss. Vísir sagði frá þessu rétt fyrir hádegið samkvæmt heimildum. Þar segir ennfremur að Ólafur Andrés hafi afþakkað tilboð frá meistaraliðinu í Sviss, Kadetten Schaffhausen, og verða þar með lærisveinn Aðalsteins Eyjólfssonar og liðsfélagi Óðins Þórs Ríkharðssonar.
Ólafur hefur síðasta árið verið í herbúðum Montpellier. Hann mun hafa flogið í gegnum læknisskoðun hjá Amicitia Zürich í morgun. Þar með ætti ekkert að vera til fyrirstöðu að endanlega verði gengið frá samningi í dag.
Ólafur Andrés verður a.m.k. þriðji Íslendingurinn til þess að leika með karlaliði GC Amicitia Zürich. Gunnar Andrésson lék með liði félagsins á árunum í kringum aldamótin og var einnig þjálfari um skeið. Línumaðurinn Kári Kristján Kristjánsson lék með GC Amicitia Zürich keppnistímabilið 2009/2010.
GC Amicitia Zürich hafnaði í fimmta sæti A-deildarinnar í Sviss í vor og tapaði með þremur vinningum gegn engum fyrir Kadetten Schaffhausen í undanúrslitum úrslitakeppninnar.
Meiðsli hrjáðu Ólaf Andrés meira og minna allt síðasta keppnistímabil sem varð til þess að hann lék ekkert með Montpellier eftir áramótin eftir að hann kom heim frá Ungverjalandi þar sem hann tók þátt í fjórum leikjum með íslenska landsliðinu.
Sviss verður fimmta landið sem Ólafur Andrés leikur í utan Íslands.
Tvær íslenska handknattleikskonur hafa samið við GC Amicitia Zürich á undanförnum vikum, Akureyringarnir Harpa Rut Jónsdóttir og Sunna Guðrún Pétursdóttir.
Þess má geta að auki að Petr Hrachovec, þjálfari karlaliðs GC Amicitia Zürich, var í gær útnefndur þjálfari ársins í efstu deild karla fyrir nýliðið keppnistímabil.
