Uppnám varð í gær innan rúmenska landsliðsins í handknattleik kvenna sem er á leiðinni á Evrópumótið sem hefst í Danmörku á fimmtudaginn. Línukonan sterka Crina Pintea greindist smituð af kórónuveirunni í gær auk tveggja sjúkraþjálfara liðsins. Það sem eftir stendur af hópnum fór rakleitt í einangrun í gær. Til stendur að skima hópinn á nýjan leik í fyrramálið. Sýktu sjúkraþjálfararnir hafa unnið náið með nokkrum leikmönnum liðsins síðustu daga.
Mjög strangar reglur gilda í undanfara EM og aðeins þeir sem hafa reynst í tvígang neikvæðir síðustu daga fyrir brottför fá að koma til Danmerkur. Þeir hinu jákvæðu verða að sitja af sér heima þangað til smitið er um garð gengið. Allir þátttakendur verða skimaðir á ný við komu til Danmerkur og síðan á a.m.k. 72 klukkustunda fresti meðan mótið stendur yfir.
Pintea er frábær línukona sem leikur með CSM Bucaresti og ljóst að án hennar verður skarð fyrir skildi í rúmenska liðinu á EM. Hún á þó möguleika á að kom inn í mótið í milliriðlum. Pintea tekur alltént ekki þátt í riðlakeppninni.
Rúmenska landsliðið á sæti í D-riðli EM ásamt landsliðum Noregs, Póllands og Þýskalands. Fyrsti leikur Rúmena verður við Þjóðverja á fimmtudaginn.
