Sænskur markvörður semur við lið Selfoss

Sænski handknattleiksmarkvörðurinn Cornelia Hermansson hefur samþykkt að ganga til liðs við Selfoss og leika með liði félagsins í Olísdeild kvenna næstu tvö ár. Hermansson kemur til Selfoss frá Kärra HF en einnig hefur hún verið í herbúðum Önnereds HK í Gautaborg.

Hermansson er 21 árs markmaður sem mun styrkja lið Selfoss fyrir baráttuna í Olísdeildinni næsta vetur. Hún kemur til landsins í lok júlí og mun hefja æfingar með liðinu í framhaldinu.

Hermansson kemur í stað Mina Mandic, markvarðar, sem ákvað að ganga til liðs við Aftureldingu eftir eins árs veru á Selfossi.