U17 ára landslið karla í handknattleik æfði í fyrsta sinn í hádeginu í dag í Zvolen í Slóvakíu eftir að allur gærdagurinn fór í langt og strangt ferðalag. Framundan er þátttaka í handknattleikskeppni Ólympíuhátíð Evrópuæskunnar.
Flogið var til Vínarborgar í Austurríki en þaðan var ferðast með langferðabifreið til Zvolen hvar handknattleikskeppnin fer fram. Í henni taka þátt átta evrópsk landslið í karla- og kvennaflokki. Ísland fékk aðeins boð um þátttöku í karlaflokki.
Eftir því sem segir í frétt á vef HSÍ þá gekk ferðin að flestu leyti vel fyrir sig. Reyndar skilaði boltapokinn sér ekki á leiðarenda. Vonir standa til þess að pokinn skili sér en fjarvera hans kom ekki í veg fyrir æfingu í hádeginu í dag.
Í kvöld fara svo allir þátttakendur mótsins á opnunarhátíð Ólympíudaganna sem fram fer í bænum Banská Bystrica, um 20 km norður af Zvolen. Alls verður keppt í 10 keppnisgreinum íþrótta í Ólympíuhátíð Evrópuæskunnar og fer meginþorri þeirra fram í Banská Bystrica. Handknattleikskeppnin verður í Zvolen.
Leikjadagskrá íslensku handknattleiksstrákanna er eftirfarandi:
25. júlí Króatía – Ísland.
26. júlí Ísland – Danmörk.
27. júlí Spánn – Ísland.
Eftir leikina í riðlinum tekur við krosspil við liðin úr hinum riðlinum og síðan leikir um sæti um næstu helgi.
U17 ára landslið Íslands er skipað eftirtöldum leikmönnum:
Andri Clausen, FH.
Ari Dignus, FH.
Arnþór Sævarsson, Fram.
Ásgeir Bragi Þórðarson, Haukar.
Bjarki Jóhannsson, Növling.
Daníel Stefán Reynisson, Fram.
Eiður Rafn Valsson, Fram.
Gísli Rúnar Jóhannsson, Haukar.
Ívar Bessi Viðarsson, ÍBV.
Kristján Rafn Oddsson, FH.
Kristófer Stefánsson, HK.
Patrekur Þór Guðmundsson, Selfoss.
Róbert Davíðsson, FH.
Viktor Már Sindrason, HK.
Örn Alexandersson, HK.
Arnar Gunnarsson og Grétar Áki Andersen eru þjálfarar liðsins. Björn Ingi Jónsson er flokkstjóri.
