„Ég er búinn að vera fjögur ár hjá Álaborg og verð alltaf ótrúlega þakklátur fyrir þann möguleika og þá ábyrgð sem ég hef fengið hér. En mér finnst vera kominn tími á nýja áskorun á nýjum stað,“ segir Arnór Atlason handknattleiksþjálfari í samtali við Akureyri.net í morgun í tilefni þess að í gær var greint frá því að Arnór hafi verið ráðinn þjálfari danska úrvalsdeildarliðsins TTH Holstebro frá og með sumrinu 2023.
Arnór hefur verið síðustu fjögur ár aðstoðarþjálfari Aalborg Håndbold og einnig þjálfað yngri landslið Dana í karlaflokki. Arnór verður áfram í óbreyttu hlutverki hjá Aalborg Håndbold sem hann segir verið eitt mest spennandi félagslið Evrópu um þessar mundir.
„Markmiðin eru háleit en raunsæ. Menn gera sér alveg grein fyrir að þetta muni taka tíma og danska deildin er bara orðin það öflug að það er ekkert auðvelt að verða hluti af toppnum,“ segir Arnór ennfremur í samtali við Akureyri.net um framtíðaráform Holstebro-liðsins. Hann segist áður hafa fengið tilboð um að verða aðalþjálfari en ekki tekið stökkið fyrr en núna.
„Ég hef fengið tilboð um það reglulega en núna finnst mér ég vera tilbúinn að fara og TTH er mjög spennandi klúbbur,“ segir Arnór Atlason handknattleiksþjálfari í Danmörku og einn silfurdrengjanna frá Ólympíuleikunum í Peking fyrir 14 árum.
Viðtal Akureyri.net við Arnór.
Arnór ráðinn þjálfari Tvis Holstebro.
